首先匯報一下成績，小弟用左1小時23分完成了10公里路程，雖然全程因為種種原因行多過跑，不過漲爆o既我能夠響指定時間內完成比賽，以第一次成績來講總算有個交代 
小弟咁大個仔第一次參加跑步比賽，所以特別要感謝兩位朋友做我的啦啦隊同人肉儲物櫃，仲要響條街等我成粒幾鐘，仲仲要幫我影相…多謝你S君和C妹 
係時候要報告下比賽前的實況
開頭擔心6:30am響銅鑼灣跑步要搭乜野車，原來渣打馬拉松好勁，連地鐵都特別開早D比我地搭。零晨3點幾就有頭班車，我跑6:30所以大約5點鐘去搭地鐵。
地鐵入面一個人都冇,(註:相中右邊的3個人形物體係銅像),如果唔係燈光火著，我估我都唔敢入去。
下落到月台，周圍都係參加馬拉松的同好…大約有十幾人。
直到轉車去天后，成個月台都係參賽者，個地鐵站好似比馬拉松選手佔據左咁
最誇張係響天后站，情況真係人山人海，比響返工時候o既金鐘仲勁。你行遲半步都比人推死你 
上到地面，氣氛更加利害。去似去左嘉年華會咁。仲可以見盡人生百態。你會見到有隻鞋同人影相…D人周圍拉筋…..周圍去(流動)廁所….周圍影相<—- 包括我 
…仲會亂咁叫…住響附近D人真係多得我地唔少
連大會都特登整個牌出來叫D人唔好咁high咁嘈
除左好似我呢D個體戶參加者之外，唔少朋友都會連群結黨咁參加，仲有唔少團體吹雞來跑，順便做下宣傳，小弟見到o既包括有:土地註冊處、香港寬頻(如果佢地見PCCW,唔知會唔會打起上來<—–亂入….)、各大專院校，中學等等…
行到咁上下，會見到個檢查站，防止沒有號碼布的人走入去…你可能會覺得洗唔洗咁誇，但係我們見到真係有人夠膽死著住舊年件衫去參加…
走過禁區，一直上天橋，大約行左幾百米左右就去到起點。於是比賽正式開始<—真係時間啱啱好 
唔通等我開始咩
沿途有好多古靈精怪野,不過因為冇帶相機，所以都係留番下年先講好啦..
今年終點響維園,去到當然又係人山人海,拿完香蕉同個梨之後，記得要將個計時晶片比番大會，如果唔係佢會扣你一百蚊同冇時間紀錄，切記切記 
自從跑完今次10km之後,我估我會將跑步當為我日常運動之一。希望下年比賽成績會特飛猛進啦！
最後等我記低下次比賽貼士先
1.頭5公里唔洗跑，急步行就可以
因為人生人海，你想跑都好難。反而會浪費你o既體力
2.早於上一組出發時間到起跑點
如果你體能超班，想由頭跑到尾。你可以早D去到起步區，排響前面令你比人左住機會減低
3.比賽前唔好食咁多野
如果唔係我驚半路中途，跑到上氣唔接下氣o個時，你乜鬼野都嘔曬出o黎
4.用平均速度跑
呢句響其它跑步網道抄過嚟
係咁多先…其它下年再講啦,bye bye
PS:剛收到大會時間紀錄,名次為3967/7003,時間竟和我自己用 Nike+ 計的一樣，看來Nike+真的很準確，希望下年會有好成績^^
